英格蘭今日進一步解封，容許零售店舖開業
喺度同大家分享吓今日所見所聞

戴口罩嘅人明顯多咗，藥房便利店超市都有口罩賣但係唔平，唔少小店賣緊一鎊一個。

但其實街上仍然好多唔戴口罩嘅人，今日咁啱目擊警察喺街拘捕咗個人，成班警察圍住一個人，由爭執到動手，不停噴口水，冇一個人有戴口罩。

唔少人防疫意識都有廣闊進步空間︰

．冇正確戴口罩，包括遮口唔遮鼻、冇將鐵線按緊、甚至將圓形的口罩轉咗90度咁戴，條鐵線喺左邊咁都有
．冇戴口罩但戴實驗室眼罩
．冇戴口罩只戴手套但週圍摸完之後再摸自己塊面
．甚至有人啱啱用酒精洗手液清潔雙手之後即刻打個大乞嚏用手接住然後當冇事發生
．有口罩但只係戴一邊或者拉落去下巴度就算

唔少店舖要求顧客入門之前要用酒精洗手液、戴口罩，有啲仲會要求戴手套。不過亦都見唔少人對呢啲措施反感，話自己冇病唔使戴口罩，又話既然戴手套就唔使洗手等等，可見大家都仍然「好有自信」。

所謂社交距離，除咗排隊時勉強鬆散地有遵守之外，根本冇人認真遵守。經過公園見到好多人喺度野餐；街邊啲長凳就好多人坐埋一齊食煙吹水；pub唔可以堂食，只可以外賣，所以pub門口企滿人食煙飲酒吹水完全好似冇事發生一樣。

M記早幾日已經開咗 drive thru，好多車塞到水洩不通；但市中心或者high street有啲分店仍然未開門，有啲有開門但只係通過app接外賣單。

Starbucks 都開放外賣，用app落單自取就快好多，去到門口先叫就有排等。

其實逐步解封，係需要封關、大量測試、案例追蹤、醫院收治能力等等全面配合先可以安全做到，而上面每一項英國幾乎都做唔到。

宜家咁樣大規模開放，係差在未開放餐廳堂食同未全面開學，最擔心就係會出現二次高峰嘅問題。事實上有幾個國家已經出現呢個狀況，睇嚟英國都只係時間問題。

希望唔好開口中。